相信大家唔多唔少，都會識得一啲朋友，行路攝埋一邊或者兜路怕阻住人，食飯唔會講自己鍾意食乜，送嘢俾佢通常會推，讚佢嘅時候一定話無咁嘅事，習慣性不停講對唔住，成日都會覺得自己做錯嘢。。。有啲特別好嘅事發生響佢哋身上，佢哋會驚，嬲，甚至會喊，話覺得自己唔配。
覺得自己唔配行路阻住人，唔配要其他人食佢揀既菜式，唔配收禮物，唔配其他人讚自己對自己好。感覺就好似，只要我保持呢個狀態，對其他人無威脅，我就安全。通常呢啲朋友仔非常樂於助人，有啲甚至係完全忘我，覺得自己唔重要，其他人先重要，佢嘅人生係為其他人而活。
唔係話全部人，但好有機會係原生家庭灌輸嘅觀念，令佢變成咁。只要成長環境中，被要求一定要屈服響父母權力之下（有時會加上暴力），或有人經常話佢冇用，認為佢唔符合自己嘅標準，無論做乜都係錯，一定要按父母嘅要求去做先係好，如果唔照做，就係曳，曳嘅細路唔會有人錫。
小朋友冇辦法靠自己生存，會發展出唔同嘅人格。有啲會發展出討好型人格，認為只要委屈自己就可能獲得愛，只要完全聽話就可能得到保護。佢哋願意放棄原本嘅自己，變成父母要求嘅形象，只要聽話，討好人，就會得到愛。
呢啲小朋友長大後，可能連自己原本係點樣都忘記，只剩低果個自少扮演嘅型像，多年強迫自己背叛自我，亦會產生一種惱怒自己嘅情緒，唔願意原諒自己嘅懦弱，用唔同嘅方法懲罰自己，唔比自己好過，認為任何好嘢都唔應該有自己份。
我哋嘅社會，好似以將一個圓形嘅西瓜，種到變成四方形為榮，原因只係四方形易存放，易管理。我哋非常大部份人，都係咁樣長大，產生唔同嘅問題，好有機會到離開果一日，都擺脫唔到，甚至認為呢個就係真正嘅自己。
想要搵返真正嘅自己，第一樣要做嘅嘢聽落好無聊，就係要知道／承認自己扮演緊一個角色。然後剝開一層又一層被灌輸嘅限制性信念，先可以自由地擁抱自己。