有啲朋友仔認為「愛自己」即係買嘢俾自己、休息多啲、做鍾意做嘅事，甚至隨心所欲、想點就點。其實，咁樣只能夠話係「啱啲唔啱啲」啦。好多人只會諗起要做乜嘢行動，但唔知道個行動背後嘅目的係乜。其實「愛自己」並唔係漫無目的咁放飛自我，而係愛惜身體、停止批判自己、耐心等待自己、肯定自己同原諒自己。
1. 愛惜身體
陪你一世嘅，係一直默默守護你嘅身體。只有身體，到你離開的那一刻，都唔會離開你。
你今日有好好同自己嘅身體講聲多謝嗎？
好多人總係將焦點放喺「身體好唔好睇」、「夠唔夠完美」，但唔記得咗佢每日都喺度為我哋全力以赴。
心臟喺度跳動，細胞喺度修復，肺部響你完全冇為意嘅情況下一呼一吸。。。呢一切，都係身體對你最深沉嘅愛。愛惜身體，唔係等佢變完美先去愛，而係從而家開始：
攰喇，就允許自己合埋眼休息
肚餓，就俾佢食乾淨健康嘅食物
痛喇，溫柔咁撫摸同傾聽佢嘅訊息
將你嘅身體當成你最錫嘅小朋友去照顧啦。當你開始愛惜佢，佢亦都會回報你滿滿嘅能量同光彩。
2. 停止批判自己
停止用完美嘅標準，去懲罰唔完美嘅自己。我哋對人往往好寬容，但總係對自己最嚴苛。
「我點解又搞砸咗？」
「點解我做唔到？」
「點解我咁失敗？」
呢啲本能嘅批判聲音，就似係一把把隱形嘅刀，不斷攻擊自己，謙棄自己，消耗緊你嘅靈魂。
療癒嘅第一步，係成為自己「最溫柔嘅旁觀者」。
容許自己有脆弱嘅時候，容許自己有不知所措嘅瞬間。每一次嘅跌倒或者所謂唔完美，都只係你靈魂體驗過程，每一次都係令你超越自己嘅台階，而唔係你嘅失敗。放鬆心情，盡情去享受得與失，所有嘅事都值得慶祝。
今日，試下將「我點解咁差」換成：
「我已經做得好好喇，多謝我嘅努力。」
3. 耐心等待自己
每一朵花，都有佢自己盛開嘅季節。🌸
你係咪都成常陷入焦慮，覺得自己改變得唔夠快？好似要趕進度咁，想即時見到效果？但人生係一段好長嘅旅程，響尋求某啲嘢嘅過程裡面，會發生無數個其他嘅過程，我哋嘅人生，由呢啲過程拼湊而成。所以，唔使趕。
宇宙嘅萬物都有節奏，春生、夏長、秋收、冬藏。
你嘅療癒同成長，同樣需要時間。
唔好急住要睇到結果，請耐心等待自己。
而家嘅所謂停滯，或者只係你靈魂喺度向下生根嘅「冬藏」時期。根生得夠深，未來先可以開出最穩陣嘅花。
容許自己慢慢嚟。只要你仲喺度吸呼、仲喺度覺察，你就行緊喺啱嘅路上。俾多一點點時間自己，好嗎？因為你係世上獨一無二限量版嘅花花。
4. 肯定自己
你唔需要變得幾優秀，先至值得被肯定。
我哋常常習慣向外索取認同，期待人哋嘅讚美、渴望世界嘅掌聲。
但最能夠滋養你靈魂嘅，其實係你對自己嘅肯定。好多時，細個嘅時候被原生家庭培養咗個討好型人格出嚟，為咗要得到愛，我哋不斷討好，以得到其他人嘅肯定為目標，強迫自己飾演其地人喜歡嘅角色。而家你有足夠嘅覺察同能力，將自己嘅力量攞返嚟。對自己負全責，你只需要自己對自己嘅肯定。
今日訓覺前，請俾自己三個細細個嘅讚美：
讚美自己今日準時起身
讚美自己對人微笑咗一下
讚美自己睇完呢篇溫柔嘅文字
當你開始睇見自己嘅好，你嘅能量頻率就會開始提升。你係獨一無二嘅星光，唔使等邊個嚟點亮你，你本身就係光。
5. 原諒自己
放下過去嘅重擔，呢個係你俾自己最好嘅禮物。
你係咪為緊過去嘅某個決定後悔、曾經受過嘅傷而耿耿於懷？間唔中會諗返起，不斷回味？
當然有啲創傷係需要特定咁去處理，而有的時候，你會發現自己因為一啲同類嘅小事件而發神經。假如你已經知道背後嘅原因，係時候原諒自己，放低佢。
因為當時嘅你，已經喺嗰個認知嘅局限之下，做咗當下最好嘅選擇。
原諒自己，並不代表過去發生嘅事係啱，而係你選擇唔再用過去嘅錯誤，嚟懲罰而家嘅自己。
將緊握嘅雙手放開，靈魂先有空間去擁抱當下嘅美好。
當你唔再懲罰自己嘅時候，你自由喇。❤️