每日我哋都會比好多訊息煩擾著，無一刻可以靜落嚟，好似成個世界都唔想你停響度，因為一停響度，你就要面對自己。
好多年前睇過一個電視節目，講一名城市神父，佢去到希臘一個冇乜人嘅山區，一個人住響一間無電話電視，簡單得好緊要嘅鄉村小屋，話要試下獨處。而令我非常震驚嘅係，當佢住到第三日就開始崩潰，發脾氣同勁喊，大概應該唔係『悶』到喊，佢係響寧靜同好靜態嘅生活裡面，被逼面對佢自己。
當靜落嚟嘅時候，深處蠢蠢欲動嘅感覺會浮上來，所有痛苦，失敗同恐懼嘅感覺，會吞噬好多人。所以城市人唔畀自己靜落嚟，未出門口已經塞住對耳仔聽歌，對眼不停睇資訊煲劇打機，剝下娛樂花生，諗下晏晝夜晚去邊度食玩買，諗下工作點上位，唔好俾人過一棟，計劃去邊度旅行，不停網購，湊仔女做家務應付奶奶，抹到架車立立令可以照鏡，今晚邊度大特價個蘋果平兩蚊，幫阿仔計劃未來廿年嘅人生，空閒時間上乜嘢堂唔好比自己停，攞多一百張cert去證明自己真係好掂，好似好充實。呢個世界有好多野提供比你，去逃避你自己，好似唔捉住外面嘅嘢，就會生存唔到咁。
最怕就係靜落嚟，諗起自己真正想做嘅嘢乜都無做到，諗起自己扮演咗一個連自己都唔鍾意嘅角色，放棄咗真正嘅自己，甚至已經唔知道真正嘅自己係點樣。諗到冇時間，無資源，冇退路去作出改變，覺得自己好似死咗一樣。
講返果個去咗山區既神父，響大概第四五日，佢開始搬石頭，響屋外邊起花圃，周圍搵咗啲植物種落去。呢個系創造力，我印象中佢話係同神之間嘅溝通，神希望佢能夠創造。其實不停創造，就係我哋生命嘅本質。
以下係人在臨終前最後悔嘅5件事，呢個係同500個臨終病人做嘅調查，順序排列。我相信試過接近死亡嘅人，好多都會有呢啲感悟。
1。沒有勇氣過自己真正想要的生活
2。沒有花足夠時間陪伴家人和朋友
3。沒有追隨自己的夢想
4。在工作上花了太多時間
5。未能更自由地表達愛
其實想做改變，幾時都唔遲，立即就開始，你手上有乜，就開始創造，唔需要比過往嘅經驗，或一啲比人灌輸嘅想法阻住你。你能夠擁有嘅，唔係所有身外物，而係呢個人生嘅呢一秒，唔係上一秒同下一秒，係呢一秒。
記住
沒有問題
只有機會
沒有過去
只有未來
❤️