唔知點解，華人嘅社會，似乎無一個讚許小朋友嘅傳統，但批評，侮辱同責罵嘅方式就層出不窮。睇武俠劇你都會見到啲角色，會叫啲仔女做犬兒犬女，阿豬阿狗，而香港人最有代表性果句就係『生舊叉燒好過生你』。無論邊個人讚你，佢哋都會同你擋晒，話你邊有咁叻，好怕你會囂，一囂就唔成材，一囂就以為自己好勁，唔聽父母嘅話。

唔係叫你去恨你嘅父母，因為好多時，尤其係上一代，生活逼人，而佢哋對於點教育小朋友係冇乜概念，只可以沿用佢哋父母果一套，以為夠狠係為你好，亦認為呢個世界只有一個方法去教仔，就係按照佢地自己既經歷去判斷。只要令到你照佢方法去做，就乜都講得出，直到你放棄做自己，成為佢想你成為嘅人。當然有啲父母或照顧人係故意侮辱啲細路，但今日唔講住。

由於原生家庭既照顧人，對自己生命都好迷失，佢哋又點可以令到你清醒又開心咁做自己呢？甚至，佢哋認為『做自己』係錯嘅，不切實際，你扮演唔到一個社會認為你成功嘅角色，你就大件事，而對於某啲諗住養兒防老嘅人嚟講，你成家都有事。

而家講呢啲嘢，係想你回憶起，有幾多觀念，係你原生家庭灌輸比你，而你選擇接受咗？分唔分得出，邊啲係你嘅意願，邊啲係選擇扮演嘅性格？

邊啲係原生家庭灌輸俾你嘅觀念？好多時係一個為咗照顧到自己同屋企人，願意違背自己意願，擁有一個社會認為係成功嘅形象，即係讀書勁，畢業搵份好工或創業，有錢有樓養番狗，搵個門當戶對嘅人結婚生仔，然後你嘅仔女讀書勁，畢業搵份好工或創業，有錢有樓養番狗，搵個門當戶對嘅人結婚生仔。。。。。

有好多人為咗要跟呢一套，痛苦不堪。心裡面會有咩嘢情緒呢？
不孝、憤怒、失敗、不安、挫折、背叛、孤立、空虛、疑惑、無感、冷漠、放棄、抗爭、虛假。。。。

而家唔係想挑起啲痛苦情緒，而係我知有好多人忘記咗，細個曾經有過呢啲情緒，帶到今日，係響你每次迫自己去扮演一個角色嘅時候，同自己嘅拉扯所造成嘅痛苦，到底呢個人生係吾係屬於我？我係咪活緊其他人嘅人生？

感受一下，嘗試去分辨一下，邊啲係被灌輸嘅觀念，邊個係真正嘅你？既然以前你能夠選擇扮演呢個角色，你今日都可以選擇唔再扮演呢個角色，永遠唔會太遲。慢慢剝開個防禦系統，感受返以前唔容許自己有嘅感覺，撇開所有嘅恐懼，真正嘅你到底係點？

想搵番真正嘅自己，歡迎聯絡我。

＃內在小孩療癒 #頌缽 #singingbowl #焦慮 #憂鬱 #失眠 #壓力 #減壓 #釋放 #靜心 #靈氣 #Sekhem #埃及靈氣 #療癒 #動物靈氣